लखनौ: लखनौ येथून दिल्‍लीला जात असलेली एक प्रवासी बस यमुना एक्स्प्रेस वेवर  नाल्यात कोसळून २९ जण ठार झाले असून १६ प्रवासी गंभीर जखमी झाले आहेत. आज सोमवारी पहाटे  आग्रा शहराजवळ हा भीषण अपघात झाला.

 

 लखनौहून पन्नास प्रवाशांना घेऊन दिल्‍ली येथे जात असलेली ही बस आग्राजवळील यमुना एक्स्प्रेस वेवर आली असताना ती नाल्यात कोसळली. बसचालकाला डुलकी लागल्याने ही बस नाल्यात कोसळल्याचे सांगण्यात येते. ही डबल डेकर बस होती, ही बस अवध डेपोची होती.

या अपघाताची माहिती समजताच पोलिस आणि बचाव पथक घटनास्थळी पोहोचले असून सध्या बचाव कार्य सुरू आहे. जखमींना बाहेर काढून उपचारासाठी रुग्णालयात दाखल करण्यात आले आहे. उत्तर प्रदेशचे मुख्यमंत्री योगी आदित्यानाथ यांनी या दुर्घटनेबाबत शोक व्यक्‍त केला असून अपघातग्रस्तांना तातडीने मदत करण्याचे आदेश संबंधित विभागांना दिले आहेत. मृतांच्या नातेवाईकांना प्रत्येकी ५ लाख रुपयांची मदत जाहीर करण्यात आली असून जखमींच्या उपचाराचा खर्च राज्य सरकार करणार आहे.